Croeso i Fwletin Misol Iechyd Da. Gwybodaeth a diweddariadau defnyddiol i gyd yn yr un fan.
Deddfwriaeth BVD, Profion a Chynghorion Ymarferol ar gyfer Practisau Milfeddygol
O 1 Gorffennaf 2024 ymlaen, bydd y gyfraith yn mynnu bod holl ddaliadau Cymru yn gwybod beth yw eu statws BVD, a bydd yn ofynnol iddynt gwblhau eu sgrinio blynyddol cyntaf erbyn diwedd Mehefin 2025.
Bydd pob daliad yn dechrau fel BVD annegyddol, gan na fydd unrhyw ddata hanesyddol yn cael eu trosglwyddo i’r gronfa ddata. Rydym yn ceisio eglurhad ynghylch y sefyllfa o ran buchesi sydd wedi’u hachredu gan CHECS ar hyn o bryd. Bydd ffermwyr yn cael hysbysiad am y gofyniad i gynnal sgrinio BVD ar yr un pryd â’u prawf TB blynyddol. Mae rhagor o wybodaeth ar gael yma.
Unedau Ynysu TB (TBIU)
Mae newid ar y gweill i reolau Unedau Ynysu TB (TBIU).
Mae TBIUs yn ddefnyddiol i berchnogion rhai buchesi yr effeithir arnynt gan TB gan eu bod yn darparu man ar gyfer lloi neu wartheg stôr o ddaliadau, sydd â chyfyngiad TB, nad oes ganddynt gyfleusterau magu digonol. Gall TBIUs gael gwartheg dan drwydded o un daliad sydd â chyfyngiad TB, ac ar hyn o bryd, caniateir cyfnod o hyd at chwe wythnos (42 diwrnod) i lenwi’r uned. O 30 Awst 2024, bydd y cyfnod cofnodi yn cael ei ymestyn i 60 diwrnod, sy’n golygu y bydd hi’n haws i geidwaid lenwi eu TBIUs. Mae rhagor o wybodaeth ar gael yma.
Profion Croen TB Lloi sydd dan 42 diwrnod oed
Bellach, ni fydd angen i loi o dan 42 diwrnod oed gael eu profi’n ddiofyn yn achos pob Prawf Cyfnod Byr (SIT), Prawf Gwirio (Ymchwiliad ac Ymyrraeth) (CT(I-I)) a Phrawf Gwirio (Lliniaru Datguddio) (CT(EM)) gyda dyddiad TT1 ar neu ar ôl 15 Mehefin 2024. Wrth gyflwyno canlyniadau ar gyfer unrhyw un o’r profion hyn, dylai profwyr ddefnyddio’r rheswm “Not Eligible for this test” iSam yn adran ‘Not Tested’ ar gyfer unrhyw anifeiliaid buchol o dan 42 diwrnod oed yn TT1 y SIT, CT(I-I) neu CT(EM) a restrir yn y lawrlwythiad System Olrhain Gwartheg (CTS). Os mai’r anifeiliaid buchol hyn yn unig sydd heb gael eu profi, dylid cyflwyno’r prawf TB fel un “complete” ar iSam. Darllenwch y nodyn briffio llawn yma.
